終於睇咗Nomadland。再一次深刻噉感受到，美國好多地方真係好荒涼，人同人之間距離好遠。
喺Google Map啱啱開始有Street View嗰時，我有時會放個人仔喺美國random嘅街景度。嗰陣時已經覺得，點解明明係離啲大城市（例如Chicago）市中心唔遠嘅地方，啲屋都可以咁疏落。屋同屋之間，竟然可以有幾十步嘅距離。歐洲就唔會係噉。
有次去美國東岸旅行。New York City當然係大城市，但就算係Philadelphia，都有好多行嘅時候覺得啲建築物好疏落，好「唔好行」嘅位置。
記得有一晚喺華埠搭通宵嘅所謂嘅「唐人巴士」去Richmond, VA，架車開得快，凌晨4:30就俾人叫醒，落車之後發現自己喺市郊（？）嘅唐餐館門口。個間嘢係自己一棟嘅，當然係未開。我截到的士想入城，司機問我去邊，我話「city centre... I mean, downtown」，佢話downtown好大架喎，我諗住去火車站點都有地方坐啦，就話去火車站。點知去到發現鎖咗：因為每日只有一班晏晝6點去DC嘅Amtrak。莫講話香港吖，就算喺英國，偏遠到喺蘇格蘭高地鄉村嘅火車站，每日都有三四班火車啦。
我呢亭喺舊大陸人煙稠密嘅城市長大嘅人，都係唔適宜去新大陸長住架喇。
==
