喺阿姆斯特丹睇咗周冠威導演嘅《時代革命》，留啲觀察記錄。
現場反應：
1. 目測有九成滿(但網上啲飛賣晒)，其中七成左右係講廣東話嘅，剩低三成唔係。
2. 由頭到尾，都間中聽到零星泣聲。
3. 銀幕上示威者力踢某門不果之後，卻發現原來係冇鎖嘅趟門嘅時候，有笑聲。
4. 螢幕上出現《榮光》MV時，唔少人和唱。
5. 片終有人帶嗌光時口號。
感想：
6. 比起《理大圍城》只係focus喺嗰十日嘅事，而《不割蓆》得35分鐘又略顯支離破碎，呢齣片應該係我so far睇過最全面咁由香港人嘅角度去講件事嘅紀錄片。真係有將觀眾帶返入去2019年嘅mentality嘅感覺。
7. 竊以為片尾講到疫情令到抗爭完結，或者可以花多少少時間佢講埋2020年2-4月發生嘅嘢。畢竟防疫同個人自由之間嘅取捨，係好多民主國家而家都面對緊嘅辯論。尋日我喺阿姆斯特丹，都遇上電車停駛，原因係反防疫措施示威。
8. 如果可以嘅話，啲英文字幕真係要執執。串錯字（例如front line變咗font line）唔影響理解，我冇所謂；但一開始就話香港政府2019年6月「amended」逃犯條例，真係會影響觀眾理解件事：佢係動議修例。而呢啲可能會令意思稍為轉變嘅英文字幕，真係唔少。
9. 不過話分兩頭，「勇武」翻譯為「Valiants」，竊以為相當貼切。
 |
| 片首的字幕卡 |
