見陳同佳放監有感

(一) 臉書上唔少朋友攞返三年前嘅石棺藏屍案出嚟對比陳同佳案，想論證逃犯條例本來就冇需要修訂。但兩件事其實幾唔同吓，事實都係搞清楚先好。

首先，石棺案三疑犯係涉嫌喺香港犯案嘅香港人。台灣方面當時只係話佢哋簽證到期，將佢哋遞解出境，遣返香港。而香港警察呢，其實並冇「喺空橋交接」疑犯。佢哋法律上只係純粹搭同一班機返香港，到咗赤鱲角先正式逮捕佢哋。呢個安排，當年嘅報紙都搞得清楚。

而陳同佳就好唔同：佢係涉嫌喺台灣犯案嘅香港人，而家身處香港。佢唔係台灣人，所以冇得「遣返」佢去台灣。

(二) 陳同佳已經服完香港刑期，喺香港係自由之身。如果佢唔想去台灣，香港政府不單止冇可能「遣返」佢去台灣，更唔應該用任何方法去「勸」佢去台灣。

管浩鳴鍾意做啲咩，當然係佢嘅自由。但政府點可以帶頭製造輿論壓力，要一個喺香港已恢復自由之身嘅居民，用自己嘅方法，去一個同香港冇引渡/司法互助協議嘅地方受審？如果大家可以接受咁樣「勸」人去台北嘅話，咁下次如果係「勸」人去德黑蘭呢？再下次「勸」人上深圳呢？

(三) 其實，而家陳同佳仲有冇人身自由？

(四) 咁潘曉穎沉冤未雪喎！即係咁，2019年都過咗大半，如果你仲關心呢樣嘢，我唯有咁答你：眾所周知，廉署成立後，呂樂總探長去咗台北，一住就住咗三十幾年，到死都冇返嚟香港受審。唔通搵洗頭艇接佢返嚟先叫公義？

或者咁講：唔係所有「窿」都係漏洞嚟架。落地玻璃容易被賊人打爛入屋，唔通全屋啲窗都要搵紅毛泥封實？

(五) 台灣當局覺得陳同佳案應該由香港司法系統處理，話謀殺係所謂「萬國公罪」，有冇法律界人士解釋吓？我知道某啲地方(例如法國)嘅法庭係無論件事喺邊度發生，都會受理其中一方係本國人嘅刑事案嘅，但香港就唔會。呢個係法系嘅分別？定係只係台灣、法國係咁？

臉書連結

時窮節乃見

起初留意才子沈旭暉，在下還在中學。那時他在明報寫《咫尺地球》專欄，有點曲高和寡，卻是我留意當代國際政治的啟蒙。

後來，沈博士也許發覺世人並不力求完美，成本效益更重要：佳作雖仍偶有，卻開始生產有如維基百科平凡中譯的文章。再後來，他化身網路名人，不時以國際花邊新聞吸引人流。他直言是「引誘losers去通過回應，去推高演算式賦予我們的影響力」；話以至此，我等後輩若不想自列losers，唯有只讀不回、只追蹤而不讚了。

沈博交遊廣博，從其全城左右紅藍綠政商名人皆為座上賓的婚禮可見。其人近年更不只專注於學術，對各行各業均有涉獵投資，粵諺「百足咁多爪」之謂也。可是，正因為一人分飾多角，有時難免讓人感到面目模糊。他本人在蘋果專訪的說法是，「『我真身如何思考，身邊朋友很清楚，但為了以上角色，每一句說話都要戴頭盔，不時要做一些主旋律行為儲血，留待扣血所用，很累，也挺討厭自己。』並笑說在北京眼中，《蘋果》訪問會扣很多血。」。但我等無緣成為其身邊朋友 ，無從判斷他在文匯儲血、蘋果扣血，抑或在蘋果儲血、文匯扣血，唯有存疑。

但隨著愈加頻繁的直線抽擊，不時出現的「國際關係邏輯題」，沈博的面目又好像清晰了一點。也許，成為網絡紅人，是為了積聚人氣、影響力；走出學界，涉獵各行各業，是為了分散風險，免得仗義執言時生計受威脅；至於之前令人取態中間著墨，也是為了在關鍵時刻帶領輿論。之前種種舖排，現在都彷彿在相互效力。

不過這三個幾月下來，在運動中顯露真性情的，又豈止一人。有些朋友此前因故或無故漸漸變得疏遠，卻因類近的看法而重新connect。又有性格特立獨行，常成為友儕間八卦主角者，大節無虧，教人自愧弗如。相反的例子，當然也有。古人謂「時窮節乃見」，信哉。當然「相濡以沫，不如相忘於江湖」，但恐怕很難回得去了。

昨晚見到朋友臉書寫着「起來，不願做奴隸的人民」，既感動又慚愧；想過轉發，但人在國外，實在沒有這樣的資格。

黎明來到，希望勇氣、智慧在香港永不滅。諸君保重。

臉書連結