睇明報話，公務員事務局推出問答遊戲，其中一條係話蘇軾、韓愈兩個都「生於同一命宮，亦即係同一星座」，問係咩星座噉喎。
我唔知出題嗰位睇唔睇得明《東坡志林》啦。入面都係蘇東坡一啲類似Facebook status（依家係咪用Threads嘅人多啲......）嘅短文，其中一篇就提到，「退之詩云：『我生之辰，月宿南斗。』乃知退之磨蠍為身宮，而僕乃以磨蠍為命」。
韓愈嘅出生日期已經無從考究。但蘇東坡就留意到，佢嘅詩其中一句提到佢出世嘅時候，月亮喺「南斗」，即係二十七宿或者二十八宿入面嘅斗宿。中國古代嘅星宿，同我哋平時講嘅星座，都係喺黃道（太陽喺天空運行嘅軌跡）上面，所以係可以互相對應嘅。喺唐朝時期已經翻譯咗，天竺傳入嚟嘅《吉凶時日善惡宿曜經》，已經提及斗宿嘅前四分一對應「弓宮」（即係人馬座），而後四分三就對應「磨竭宮」（即係摩羯座）。所以蘇東坡推論韓愈係摩羯座，都有大機會係啱嘅。
但無論係韓愈原詩，定係蘇軾引用，都好清楚係講緊月亮。「月」宿南斗呀！摩羯座係佢月亮星座嚟㗎！因為韓愈嘅出生日期已經無從考究，所以我哋唔知道佢嘅太陽星座（即係我哋最常用，將一年分做十二份，睇出生日期嗰個）係咩。
至於蘇東坡，記載話佢嘅生日係景祐三年十二月十九日，即係西曆嘅1037年1月8日。太陽星座的確係摩羯座。根據網上嘅星座計算器，嗰日全日嘅月亮星座都係雙子座。
蘇東坡本人係好清楚太陽星座、月亮星座之間嘅分別嘅：佢話韓愈「磨蠍為身宮」，自己「以磨蠍為命」，用咗「身宮」、「命」兩個唔同嘅稱呼。雖然而家嘅紫微斗數計「身宮」、「命宮」嘅方法，似乎已經同太陽、月亮嘅位置冇乜關係，但可能喺宋朝嘅時候有門派會用到都唔定。
（注：馮晞乾認為喺中國星命學入面，「命宮」嘅概念更加接近上升星座。如果係咁，我哋可以根據蘇軾嘅上升星座推測埋佢嘅出生時辰，得出佢嘅八字。 ）
嚟到呢度，我哋總結吓：
- 韓愈：太陽星座無從考究，月亮星座為摩羯座
- 蘇東坡：太陽星座為摩羯座，月亮星座為雙子座
佢兩個係同一個（太陽）星座嘅機率，應該係十二分之一。
 | |
| 圖：摩羯，係古代印度神話入面陸首海身嘅神獸，梵文原文係makara。呢隻碟依家收藏喺愛知縣陶瓷美術館（來源：維基百科）。 |
=====
話時話，七年前就寫過蘇東坡如果係呢個時代出世，應該依然會填詞，填一首《可惜我是摩羯座》。不過可能唔啱音，畀人問「返開邊間教會」。陸游：「世言東坡不能歌，故所作東府詞多不協。......公非不能歌，但豪放不喜剪裁以就聲律耳。」
=====
.jpg){kind=link}