喺喬治亞嘅一件小事

突然諗起三年前，去喬治亞旅行既一件小事。

嗰日我去到首都提比里斯，約咗喺嗰度嚟嘅大學舊同學，仲有佢嘅朋友，去城北的酒館敘舊。一開始，我哋只係喺度講返喺倫敦讀書嗰時嘅事，各自事業有咩發展，又或者其中一位最近屋企喺東面嘅Kakheti地方買咗個葡萄園咁啦。但過咗一陣，又飲咗一兩杯，竟然同佢哋傾起喬治亞政治。

作客人哋地方，又多年未見過，貿貿然講呢啲其實有啲魯莽。只好怪喬治亞嘅紅橙白酒實在好飲，葡萄美酒水晶杯確係有功效。一齊去嘅穆醫生冇飲酒，就唔會犯同樣嘅錯。

自玫瑰革命(2003年)以嚟，喬治亞都幾親西方。路牌都有英文，同年青人溝通基本上亦都可以用英文，周不時會見佢哋喺《經濟學人》賣廣告做投資推廣。街上面嘅歐盟旗同國旗差唔多咁多，唔講仲以為係歐盟成員國添。事實上，喬治亞連歐盟候選國都唔係。

提比里斯街景，可見歐盟旗（藍底十二星）與喬治亞國旗（五重十字）並列。自攝於2017年9月9日。

於是我講咗句，歐美雖然國力強盛，但係啲人民錫身，有咩事起上嚟唔可以靠佢哋出力幫拖。2008年俄羅斯同喬治亞打嘅南奧塞梯戰爭，2014年俄羅斯入侵烏克蘭嘅克里米亞，歐美基本上都係口惠而實不至，恐怕唔可以齋靠佢哋。同檯嘅朋友就話，民主化之後政治、文化都係同歐洲比較夾，況且咁樣經貿上亦都有好處。

如是者，傾咗半杯酒嘅時間到，朋友平靜但係又堅定咁望住我，講咗句：「Well, it’s the path people of this country have chosen」。

嗰一刻，我先至留意到自己嘅失禮。作為一個外人，我或者係睇過吓啲新聞，讀過一本半本書，但始終冇用到同理心去代入喬治亞民族嘅情感，佢哋同俄國嘅多年恩怨，試圖同佢哋感同身受。

人喺一個共同體裏面，唔單止分擔痛苦、分享榮耀。每個成員憑自由意志行動嘅結果，都好受彼此嘅選擇影響；因此好合理地，會睇其他人做咩去決定咩先至叫係好，自己應該做啲咩。而群體成員嘅取向同偏好，亦都好難靠個體嘅力量喺一時三刻改變。但呢啲咁嘅諗法、背景，外邊嚟嘅人未必會即刻明白。

今日聽到抱怨，話香港搞成咁，出面嘅人、外面嚟香港住嘅人仲可以咁冷漠。講吓講吓，就諗起呢件事。

提比里斯的喬治亞菜館。自攝於2017年9月9日。

臉書連結

珍惜中午的光線

啱啱個禮拜六，我30歲。雖然瘟疫流行，但慶幸各方好友仍然願意賞面，同我喺倫敦唔同嘅地方流水式咁野餐咗三次，真係感激不盡。

之前好似有一排興過喺Facebook寫生日感言，但我就咁多年都無寫過。唔係覺得無謂，而係因為懶：打開電腦入面嘅筆記，好似每隔一兩年嘅生日就會想寫感言，但全部最後都半途而廢。例如25歲嗰年，只係打咗標題「5x5」；冇記錯嘅話，係某位同事講笑，話25係重要嘅年份，因為在下一個平方數就要等到36喎。然後，27歲嗰年嘅標題係「霎眼廿七歲」（時日無多，但過日辰即係慢性自殺），仲配埋圖，又寫咗二百幾粒字，但最後又係無疾而終。舊年只係打咗一句，「霎眼廿九歲都啱音」，er……好彩冇加多粒人生污點。點都好，機會過咗就係過咗，以後都冇得再套用陀飛輪㗎喇。

有朋友喺WhatsApp度提到三十而立。我諗，孔子嗰陣時計虛齡，怕且舊年已經「立」咗。不過「立」係點解呢？朱子嘅註解，係「有以自立，則守之固而無所事志矣」，似乎即係對世界嘅睇法變得完整，有以自立，就唔需要再念念於所志咁解。如果係咁，好似有啲合理，但又有啲驚：越係睇落完整嘅嘢，就越難攝啲新嘅嘢入去。希望以後仲可以與時並進啦。

唔經唔覺，已經搬咗嚟英國十年有多。起初諗住可能只係暫時，點知就好似長沙灣個臨時家禽市場咁，臨吓臨吓，就臨時咗好多年。又有啲本應係長久不變嘅嘢，驟眼間就消失。

呢幾年不時覺得住厭咗倫敦，想搬去第二度住吓。無論係英文報紙定中文媒體，Twitter定係Facebook，都睇到覺得冇乜新意。尤其是係啲評論文章：有時睇到標題，已經大約知內容係點，呢一派會用咩切入點，有啲咩盲點咁。但世界雖然咁大，試問我又可以去邊？我又唔熟中英文以外嘅語言──雖然冇話唔可以學嘅，但要去到能夠睇佢哋嘅報紙，觀察佢哋嘅網民互動，應該都要啲時間同心機咁囉。

之前有居家令嘅時候，好多時出入都會租單車踩。今年收到個頭盔做禮物，對於周不時瞻前顧後，「又要威，又要戴頭盔」嘅在下，都真係幾啱。

生日有咩願望？其實過往一年咁嘅情況，叫人快樂都好似唔知想點咁。希望明年今日，可以喺重光嘅香港見到大家啦。希望在明天吖嘛。

左起順時針：City Hall, Regent's Park, Queen Elizabeth Olympic Park

臉書連結