A matter of finite hope: 大嶼山唔只係個島，更加係座山

喺我哋市區人嘅眼光裏面，大嶼山只係一個大島。最近有網友留意到迪士尼明明喺大嶼山，但就有一半喺荃灣區、一半喺離島區，就覺得「有啲奇怪」。其實，如果代入以前啲漁民、農民嘅角度，就會覺得噉樣先至係正常。

大嶼山內部多山，島內交通十分之唔方便，唔可以作為一個經濟整體噉去理解。反而，鳳凰山、大東山就好似八仙嶺分隔上水同大埔咁，將大嶼山上面嘅居民分開。

啱啱睇完前港英新界政務署長許舒（James Hayes）1970年嘅《香港地區 1850-1911》。其中就提及喺1899年嘅時候，大嶼山上面嘅農村、漁村嘅居民，主要會去四個墟市：大澳、長洲、坪洲、同埋元朗(！)。其中三個都唔喺大嶼山上面。

1899年大嶼山嘅鄉村聚落，同埋佢哋關係最密切嘅墟鎮。
跟住許舒嘅《香港地區 1850-1911》表12（頁141）嚟畫。

諗深一層，其實又唔難明嘅。今時今日交通發達，香港境內大部份地方都通咗車路。但係喺以前，行水路往往係方便過行山嘅。試想像吓，你啱啱曬好咗啲鹹魚要去趁墟賣，順便想買隻豬返屋企。你話放啲鹹魚上船撐過去辛苦啲，定係孭住行山辛苦啲？

正因為係咁，大嶼山西面嘅農村、漁村，由北面嘅東涌去到南面嘅塘福，都會去大澳趁墟。

而東面、南面，即係芝麻灣半島、貝澳、梅窩一帶，佢哋嘅主要墟市係長洲、坪洲。其中長洲比較繁盛，向西就遠到石壁鄉嘅居民都會吸引到過嚟。而縱貫大嶼山南北岸嘅東梅古道，亦都吸引咗大蠔灣、白芒村嘅居民去長洲趁墟。而住喺竹篙灣、大白（今日嘅愉景灣）、稔樹灣嘅話，就會去坪洲。

直到今日，長坪兩洲雖然喺新界，但冇「鄉村」，亦都冇原居民代表，法律上係全港唯二嘅「墟鎮（market towns）」，只係得代表居民嘅街坊委員會。而坪洲鄉事委員會，仍然包括大嶼山上面嘅稔樹灣，同埋已經變咗愉景灣嘅大白、二白。

更加有趣嘅，係大嶼山北岸嘅東涌、沙螺灣、大蠔灣，亦都會去元朗趁墟。睇嚟行水路真係可以去到好遠都唔怕。

語言方面，似乎大嶼山大部分嘅村都係雜居嘅。就留意到貝澳十村有十二姓：客家、本地各六。如果計土地業權，更加係客家人多啲。石壁就純係本地人。長洲、大澳作為墟市，更加係講各種民系嘅人都有。可見去邊度趁墟，係山川形便嘅緣故為主，同講咩話關係唔大。

二戰後港英政府為咗行政方便，推動全新界嘅鄉村組成鄉事委員會，就通常係用當時嘅墟市作為中心。出來嘅結果，其實同1899年嘅觀察相差無幾。一條村係屬於「大嶼山南區」定大澳，基本上睇去長洲定係大澳趁墟就知。大蠔灣嘅白芒、牛牯塱、同大蠔新村，就因為東梅古道嘅緣故，繼續同梅窩扯上關係。嗰陣時，梅窩去中環嘅渡輪應該只係啱啱開辦，呢啲村嘅居民買嘢怕且都係去長洲。