對《粵切字改革方案》嘅一啲諗法

今日喺旺角見到呢張海報。我覺得好有創意，亦都相當完善，真係好佩服作者。但正所謂「無所因而特創者難為功，有所本而求精者易為力」，我亦都有啲感想，希望可以大家分享吓：

「粵切字改革方案」，2020年12月16日攝於旺角

（1）個表入面有兩種注音嘅方法。第一種，就係用大家都好熟悉嘅拉丁字母；第二種，就係用唔同嘅字或者係邊旁去表示一啲聲母同韻母，再好似韓文咁將佢哋嵌一個方塊入面。

其實呢，如果係為咗有一個大家都接受嘅標準去表達、交流啲發音，用拉丁字母已經好足夠，亦都方便已經識得一種歐洲語言或者漢語拼音嘅人去學。

當然，如果係想順便創製一個系統去寫一啲廣東話入面而家「有音冇字」嘅字，就好似韓國嘅《訓民正音》咁，咁又唔同講法。至少，咁樣創造出來嘅方塊字，係的確比較容易融入粵文嘅。但如果係咁嘅話，或者亦都應該搵一個方法，將個聲調都放埋入個方塊裏面。

（2）其實我覺得，粵語拼音應該盡量係基於香港民間咁多年來已經形成咗嘅習慣。咁樣先至容易學，容易學先至多人學得識，先至可以普及。

（3）依家唔精確嘅嘢當然要改善：例如貝澳個「貝」同天水圍個「水」明明唔同韻，但而家好多時都係用「ui」去寫，呢啲就應該要分返開。

（4）但係，點解要用/j/去標示「央」嘅聲母？我知，粵拼（Jyutping）、國際音標（ IPA ）同埋德文都係用/j/。但如果我哋睇返個現實嘅情況，除咗乙明邨（Jat Min Chuen ）之類嘅個別例子，香港人其實係習慣用/y/嘅：例如元朗嘅元，大家都會諗到「yuen」而唔係「jyun」。

我覺得，如果已經習慣用嘅用法冇問題，就應該繼續用。所以，用/y/會好啲。

（5）如果用咗/y/做聲母，咁為咗避免混淆，或者亦都應該用個表而家冇用嘅/ue/去表示漢語拼音同德文裏面嘅「ü」，而唔係用/yu/。

咁樣仲有兩個好處：一嚟，係香港人平時都係咁用——例如「雪」，通常都會用「suet」而唔會係「syut」；二嚟，亦都有先例係咁做：例如德文打唔到ü嘅時候，就會用「ue」。

（6）因為同樣嘅道理，「z」、「c」可以用香港比較常用嘅「j」、「ch」（或者「ts」）代替。

（7）其實寫粵文真係好難，一唔小心就會夾雜咗啲白話文入去。就好似隻一直都住喺陸地上面嘅鴨，要逼自己學返識游水咁。

臉書連結