最簡單嘅答案，係因為粵語入文可以幫我哋自強。無論我哋嘅普通話或者英文學得幾咁精通， 我哋用白話文、英文寫嘢嘅時候， 總有一種患得患失，驚母語使用者覺得我哋唔夠符合文法嘅感覺。
例如呢十幾年白話文又興返一種文言文常見嘅手法：將啲形容詞當動詞用。例如《七里香》：「那飽滿的稻穗/幸福了這個季節」。我依家會諗，如果呢句唔係出自臺灣（或者大陸人）手，而係香港人寫，肯定有多啲人話寫得唔好，唔符合文法啦。
又例如英國有間火車飛公司trainline，佢幾年前喺倫敦地鐵賣廣告嘅標語「I am train」，其實都係唔合文法。如果出自一間香港公司，喺香港地鐵登，應該都有唔少人會笑佢。但呢句嘢登喺英國，英國人講嘅點會唔係英文呢？
有時，同樣係唔合文法嘅嘢，母語人嗰啲係「口誤」、「破格」，外人嘅就係學藝未精。
當然，為咗商貿文化交流起見，香港人應該至少學好兩文三語。呢個絕對應該做、值得做、快啲做。但係我亦都覺得，去到最尾，俾香港人有以自立，無拘無束咁表達自己嘅，就只係得(港式)粵語。寫喺紙上面、打喺螢幕上面，就係粵文，同埋佢未係咁完善嘅拼音(亦即係所謂Chinglish)。
No comments:
Post a Comment