A matter of finite hope: 不割蓆

最近睇咗兩次《不割蓆》。

唔係太清楚一套紀錄片點樣先為之好，但或者以下呢件事可以作參考：我第一次睇，係同一位冇跟開香港情況嘅大陸朋友睇嘅。因為時不時要停低解釋背景，我哋睇吓又停下，停下又睇吓，短短35分鐘嘅片，睇咗差唔多個半鐘。係我太過熱心，定係條片可以花多啲時間將個背景交代得清楚啲？我唔肯定。

至於第二次睇，就有好幾位來自香港嘅同鄉一齊睇。我哋睇住2019年嘅片段，有位黃到話可能唔再返香港嘅朋友講咗句：「早知係噉嘅結果，其實真係好無謂。」喺嗰一刻，我竟然唔知點樣反應。

然後我諗起，嗰年有一次同一位我發現都幾藍嘅「港漂」朋友，喺一間後來俾人話係藍店嘅餐廳食飯時，佢都講過類似嘅嘢。佢當時嘅講法係，「國家要應付貿易戰都已經夠麻煩的了；香港的示威不會得到什麼，只會為國家增添麻煩。真不明白為甚麼你們支持這麼無謂的事情。」

我望住佢話，其實啲抗爭者好清楚，成功爭取民主嘅機會其實幾細。你睇返[19年]5月時嘅文宣就知。但佢哋更加覺得，越拖得耐，個局勢只會更差。如果80年代行出嚟嘅話，成功嘅機會冇咁細；90年代就細咗啲，00年代又再細咗啲；隨住香港係中外關係嘅獨有作用越嚟越細，未來只會更加渺茫。既然我哋冇得倒流時光，依家永遠係最好嘅時機。我仲半帶講笑噉話，如果啲示威者引用〈後出師表〉嘅話，可能會講「然不伐賊，王業亦亡，惟坐待亡，孰與伐之？」

時間呢樣嘢都幾得意：越多嘢發生，就好似過得越快噉。而呢兩年發生嘅嘢真係好多，大家好似都唔再係好記得19年5月嗰時嘅悲情。嗰陣時好多香港人都覺得，冇㗎啦，香港嘅宿命，就係喺全世界唔為意或者扮睇唔到嘅情況下，慢慢變成同大陸一樣。政治、文化，都係噉話。畢竟，又有幾多人在乎錫金點樣慢慢變成印度？又有幾多外人關心過DQ立會議員、一地兩檢？而如果跟返上次香港前途問題嘅時間表，最遲30年代頭呢件事就會發生。

如果我冇記錯嘅話，正因為有呢種「香港就嚟冇咗」嘅感覺，先咁多人會喺嗰年行出嚟。

我喺度諗，如果我哋可以同當時行出嚟嘅香港人講，噉樣落去，最後場運動會比突如其來嘅瘟疫打散。五大訴求都係爭取唔到，你呢一刻認識嘅一國兩制會喺一年內玩完。好多人會犧牲。但係世界會睇到呢場運動，好幾個西方國家都修改左佢哋嘅移民政策，大部份嘅香港人都有得走——佢哋會俾咩反應？

佢哋會唔會話，「一國兩制遲早都玩完㗎啦，噉樣都係提早十年啫」？佢哋會唔會覺得，就算爭取嘅嘢最後得唔到，但係換嚟香港人更強嘅社群認同，世界對呢樣嘢嘅認識同關心，仲有去第二度dub一份未必好似，但總算係香港文化copy嘅可能性，等香港人社群、香港文化有多啲機會可以發展落去，其實都算值得？

我唔知咩答案會多啲。但係我諗，對於嗰個又得人驚但係又冇得避嘅未來，嗰個「本來會發生」嘅時間線，佢哋應該俾我哋記得嘅更加清楚。因為，對而家嘅我哋嚟講，嗰個只係啲冇發生嘅嘢；但對嗰陣時嘅人來講，嗰個係佢哋要面對嘅未來。

噉樣諗落，嗰年嘅口號叫人「不割蓆」，都真係有啲先見之明。

****