香港第五波疫情展望

禮拜六同兩位朋友開live，回望英國「行先死先」嘅疫情經驗，兼展望香港嘅情況。

我哋嘅結論係：香港可能已經進入咗英國第一波疫情嗰個狀態。未來一兩個月，無論係疫情、定係抗疫心理，香港會12x倍速噉經歷我哋過往兩年喺英國經歷過嘅嘢。希望大家保持冷靜，戴好口罩，買定啲藥，入定各種必需品；盡人事之餘，亦都要喺政策搖擺嘅亂流下平安。

（如果淨係想聽我哋展望香港，可以直接跳去1:50:42。條片嘅caption亦都加咗timestamps，方便大家skip住睇。）

噚日（2月28號）香港確診個案數係34,466，已經同英國全國嘅數字相若。而衛生防護中心嘅歐嘉榮醫生更加澄清話，呢個數字只係計入核酸測試結果驗出嚟嘅個案。換言之，即係：

1. 相關嘅樣本，應該係好幾日前已經收咗返嚟，只不過28號先驗到噉解。
2. 而28號收返嚟嘅樣本，應該都要過幾日先有結果。
3. 公開嘅數字未計入屋企做嘅快速測試結果。
4. 換言之，每日公佈嘅數字唔單止有delay，亦都有遺漏（2020年3、4月英國都係噉，但今年已經係2022年......）。

真實數字可能更加接近港大喺2月21號發表嘅推算：2月28號嘅單日染疫人數超過140,000。

無論攞邊個數字，以過往兩年嘅經驗睇，如果同樣嘅人均個案數 / 人均死亡數係任何發達社會出現，應該已經封緊城、有禁足令。

但而家香港未有。

（當然，我知香港嘅住屋情況、人口密度、生活習慣、政治環境、同埋對政府嘅信任不足，唔係能夠同其他發達地區嘅普遍情況一概而論，唔可以生搬硬套。）

而同一份港大報告嘅推算話，如果防疫措施維持現狀，估計去到三月尾，全香港會有多過450萬人曾經被感染，超過180萬人會有過症狀。

若果真係噉，我唔知但想知嘅係：

一）喺呢段期間，當局仲會整啲咩防疫新招出來？有幾有用？

二）第五波嘅高峰掃過之後，隻病毒會留存喺民間，社區一地都係。個案數字會喺一百幾十左右嘅「低位」徘徊。到時當局仲會唔會堅持「清零」？有關嘅社會、經濟成本有幾高？

三）到咗每四個人就有一個人發過病嗰時，社會大眾會點樣看待呢隻病毒？

香港嘅2022年會係點，好大程度都視乎呢三條問題嘅答案。

今日係正月二十九日。無論將來係點都好，祝大家身體健康，家宅平安。

倫敦市中心Regent Street，攝於2020年5月16日14:28，第一波疫情封城期間

臉書連結

#StandWithUkraine

 （今日唔少諗法飛過，寫嘢比較混亂，唔好意思）

見到幾位朋友都貼咗之前去烏克蘭旅行嘅相。我冇去過烏克蘭，但五年前由亞美尼亞返英國嘅時候，喺基輔機場轉過機。

前年年底亞美尼亞、阿塞拜疆戰火重燃，最後以阿塞拜疆攻克部份爭議土地，俄國派兵維持和平告終。嗰陣時會諗起旅途嘅見聞：修道院好似已經轉咗手，唔知嗰位當過兵、入過修道院嘅導遊而家點呢？ 喺後來變成戰區嘅城市裏面，有座美國亞美尼亞裔捐錢起嘅醫院，睇落又新又靚，唔知有冇受到波及呢？

今朝早俄羅斯入侵烏克蘭，有報道話俄軍嘅直升機、傘兵已經降落咗喺基輔機場，同駐守嘅烏克蘭部隊展開槍戰。諗到客運大樓入面食過嘅頹意粉店，依家可能已經係巷戰現場，突然覺得呢個世界好唔真實。

畢竟啱啱個週末，喺某個Signal group仲半認真噉討論緊「去基輔嘅Ryanair機票£16來回咋，不如一齊去支持烏克蘭經濟」。

時不時都會覺得，我哋呢代喺冷戰結束後嘅香港長大，睇教育電視得知華沙公約解體，民主化係世界潮流，個成長背景真係算得上係世界歷史裏面嘅異數。我哋冇走過難，冇見過貨幣裏面嘅黃金含量可以一夜消失，冇見過每隔一兩年就會修改、取消、或者重新引入嘅租務管制；我哋傾向以為世界係穩定嘅，但呢個只係蘇聯意外解體，美國暫時獨大嘅空窗期，本來就可能係歷史潮流裏面嘅例外。

有啲懷疑自己係有啲冷血。

攝於2017年9月17日，基輔Boryspil國際機場。

後記：原來俄軍試圖空降佔領嘅係貨運嘅Hostomel機場，唔係客運嘅Boryspil機場呢。

臉書連結

倫敦染疫記

香港好似越嚟越多人中Covid，又越嚟越多人要留喺屋企隔離。諗返小弟跨年前後中過Omicron，都有啲經歷可以分享。

當然，每個人染病嘅反應都唔同，倫敦同香港嘅情況亦都唔同。所以大家都係睇吓好喇；如果有任何嚴重病徵，當然要即刻求助啦。

我第一次測到陽性，係12月29號。嗰排天氣都幾凍，所以嗰朝早雖然有啲鼻塞，但都冇乜太為意，按原定計劃去咗附近嘅醫院打第三針。之後休息咗三四個字，仲行咗過去門診部嘅Urgent Care Centre睇吓有冇得睇醫生：原因當然唔係鼻塞，而係因為早幾日趕火車時跣低，扭傷咗肌肉，坐低起身都覺得痛。但去到就發現，因為疫情嘅緣故，依家要先打111 ，有需要先至會轉介你去睇緊急門診。好啦，噉我返屋企。

返到屋企冇耐，就按原定計劃同兩位啱啱由香港過嚟嘅朋友飲茶、行公園——兩位都冇打過針，但之後用咗幾次快速檢測盒測試都係陰性。然後再去另一位朋友屋企食晚飯——喺大陸應該俾人定性咗做超級傳播者，要遊街或者網路公審。但聖誕到新年，大家都請咗成個禮拜假吖嘛，係噉㗎啦。嗰晚同場有八九個人，但係除咗一位大約50歲嘅來賓之外，大家都冇測到陽性。都唔知係咪Omicron病癥比較隱蔽，所以先至傳播力強，令人防不勝防。

嗰晚返到屋企，望住書架頂嘅NHS快速檢測盒，就諗，上次測到陰性都已經係Boxing Day嘅事，不如做多次睇吓。

點知就見到兩條線。

嗰刻諗到要做嘅有三件事。

第一件事，係通知過往幾日見過嘅所有朋友。之後NHS亦都有用電郵寄張表格嚟，叫我填最近接觸過嘅人。噉我諗，都係叫佢哋做吓快速測試姐，就如實填報。點知原來係打咗針嘅就只需要做測試，未打針嘅就要留喺屋企隔離十日，真係一唔小心就會得罪人呢。

第二件事，係搵核酸測試確認結果，點知都係波折重重。首先上政府個網預約，點知嗰晚佢竟然顯示最近嘅測試中心喺德雲郡，一啲要搭三四個鐘火車嘅地方，但佢又叫人唔好用公共交通工具去測試中心……而啲私家測試中心呢，似乎都係主打飛前測試，好幾間都講明謝絕快速測試陽性嘅人。搞吓搞吓都好夜，最後都係決定瞓先。

第二朝起身，八點幾，隨手再登入政府個網，竟然搵到倫敦某個測試中心嗰日晏晝有位。即刻預約咗。然後先諗起，行過去要大約一個鐘，因為肌肉拉傷嘅關係又唔想踩單車，但係又唔搭得公共交通工具……行就行啦，反正要居家隔離十日，得呢個機會可以出街。

有位朋友話噉嘅時勢，去核酸檢測中心等如玩七級豬：去得嘅都係初步陽性，喺嗰度唔係我傳染人，就係人哋傳染我，最後都係大家中晒。

但去到，竟然發現完全唔使排隊，成個時段得我一個人。

似乎個樽頸位唔係測試中心度。或者係化驗所啲人都請晒聖誕假，所以處理唔到咁多樣本？唔知。不過就算係都冇得怨；一年都尾，有邊個唔想放假吖。

第三件事就係買藥。我懷疑呢個大家會有多啲興趣。當時啱啱開始鼻塞，比較驚係鼻水倒流刺激喉嚨，刺激到咁上下就開始咳，一咳就會更加唔舒服。所以就買咗：

1. 一隻噴鼻嘅收鼻水藥，感覺好似見效快啲。嗰陣見香港都有，但價錢係英國兩倍。
   
   
2. 有檸檬味、有黑加侖子味嘅Lemsip沖劑。呢個香港應該冇，但佢嘅主要有效成分好似同Panadol一樣，都係paracetamol。
   
   
3. 潤喉嘅嘢。史立消喉糖買咗幾盒，包裝上面話每日最多可以食12粒，我好似真係食到上限。枇杷膏開暖水都飲咗唔少——不過呢個都算係一種個人喜好，冇病都間中會飲。

1月1號留喺屋企，唯有邊飲Lemsip，邊睇叱咤。

此外，天氣凍又要留喺屋企，自然飲多咗暖水。唔知有幾有用，但長命先可以撐過去，痊癒中應該多喝水（好似係）。

我都算係比較好彩嘅。前後只係咳左一兩日，反反覆覆噉鼻塞咗一個禮拜到。冇發燒、冇失去味覺；1月4號喺屋企開返工之後多咗覺得攰，但怕且未必關隻病毒事。

當時嘅規定，係連續兩日快速測試陰性就可以提早出返街。但我就陽性足八日，睇住第二條線越嚟越淺色，結果都係第十日中午先可以出返嚟，只係慳到半日。

開始隔離嘅時候，倫敦仲係好有聖誕氣氛。之後心理上就好似時間停頓左噉。出到嚟發現已經曲終人散，就好似我係喺十日前跨越時光過嚟噉，都有少少唔適應。

=====

後記：寫到最後嘅時候，喺度諗，呢個比喻係喺邊度讀到嘅呢...... 搵咗陣先搵到，原來係驗到陽性前幾日嘅立場新聞文章：

他[律師]形容外面的人和還押中的被告，彷彿活在兩個不同的時空，「佢哋來自有初選、有公民社會嘅香港，佢哋出現喺法庭時，當然好了解出面社會變化，但佢哋嗰種神情、鬥志、狀態都係來自嗰個時空嘅狀態，我哋好似未來人咁。」

=====

臉書連結

地鐵站名應該音譯

聽講最近北京地鐵喺度「去英語化」，例如本來北京南站本來標記做「Beijing South Station」，而家就變成「Beijingnan Zhan」；傳媒大學站本來係「Communication University of China」，依家就變成「Chuɑnmei Dɑxue」。

有啲人就話，呢件事簡直係白癡：識睇漢語拼音嘅人，99.99%都識中文，根本唔需要睇英文；而淨係識英文嗰啲，咁樣一改，佢哋就睇唔明。

小弟不敢苟同。我覺得噉樣一改，係會更加方便外國遊客。

道理好簡單：如果我係一個鬼佬，喺北京蕩失路，要問唔識英文嘅北京當地人點樣去南火車站，我勉強歪歪哋噉講「Beijing Nan Zhan」，人哋或者估到我想去邊。好彩嘅話仲可以指埋我去搭啱嘅地鐵線。如果講「South Station」，唔識英文嘅路人就算想幫你，都有心無力啦。

歐洲都係咁。例如雅典嘅Σύνταγμα站，其實個字解憲法，Constitution，個站上面嘅就係「憲法廣場」。但地鐵站只會音譯做Syntagma，唔會意譯做Constitution。阿姆斯特丹南站只會寫Amsterdam Zuid，唔會寫Amsterdam South。巴黎嘅北火車站亦只會係Gare du Nord, 唔係North Station。

作為遊客，我亦都慶幸佢哋揀音譯，唔會畀啲咩「Constitution」、「North Station」我睇。原因一樣：如果喺雅典搭的士，同司機講要去「Syntagma」，佢明我想去邊嘅機會率應該大過我話想去「Constitution」；喺法國問人點去「Gare du Nord」，亦都好過講咩「North Station」。講到尾，雖然英文已經好普遍，但都唔可以假設人人都識英文㗎。

當然，如果以方便遊客嘅角度諗，最好就係喺音譯下面加番附近有咩景點。例如「十三陵」寫「Shisanling」冇問題，但下面加返行細字「(exit here for the Ming Tombs)」就更好啦。而北京地鐵似乎都有咁做。

所以對於北京地鐵嘅拼音化，我係樂觀其成嘅。不過，短期內都應該唔會去北京（亦都去唔到），就算去到都係睇中文搵路。所以...... 是但啦。

北京南站外觀（圖片來源）

最後講啲題外話。中國嘅國家標準，《漢語拼音正詞法基本規則》，係要求「以詞為書寫單位」，例如「跑」係「pǎo」，「芙蓉」係「fúrónɡ」，「無縫鋼管」就要拆成「wúfènɡ ɡānɡɡuǎn」。噉我對「北京南站」嘅理解，就應該係北京市區南面嘅一個火車站；就好似「旺角」係喺旺角嘅東邊，而唔係有個地方叫「旺角東」。咁樣嘅話，根據中國官方自己嘅規矩，唔係應該好似「Mongkok East」噉，叫做「Beijing Nan」咩？做咩黐埋一嚿噉寫「Beijingnan」？

======

CNN 2022年1月6日報導

臉書連結

面對連環不幸的幽默感

近日傷病迭來，除夕獨留家中。咁啱Spotify又唔知攞景定贈興shuffle到〈E先生連環不幸事件〉(笑)，聽住聽住，好無聊咁諗到一個想問填詞人嘅問題：失戀可以係「不幸」，呢個我明，但除咗頭半句，歌詞裏面邊有「連環」？

聖誕前某次吹水，我講笑噉話，如果想知咩叫「遺憾大滿貫」，不如聽何韻詩嘅〈幽默感〉：貫徹黃偉文00年代嘅風格，就好似係打開嗰陣時某本不幸事件分類圖鑒，每一章攞例子俾你睇噉。然後再鼓勵聽歌嘅人，

「危難拍著門 / 若果躲不了 / 就迎著極殘酷一生 / 自行落調味品」

再反問

「情願怕它 / 還是笑它」

嗰陣時，2021年仲有十幾日剩。

2022就到，祝大家新年快樂，凡事心安。

（2021年12月31日）

何韻詩《野外MiniLive Concert》網上音樂會，2022年1月2日

元旦嘅叱吒頒獎禮上面，黃偉文攞填詞人大獎嘅時候有感而發，亦都提醒觀眾：

「記住，音樂同埋幽默感，無論日子過得幾艱難，都要揸實，唔可以失去。」

共勉之。

（2022年1月4日）

省事與進步

兩三天前與朋友聚餐，偶爾談起華夏曆法演變。小弟無故想起《顏氏家訓》的一段資料，是這樣的：

前在修文令曹，有山東學士與關中太史競曆，凡十餘人，紛紜累歲，內史牒付議官平之。吾執論曰：『大抵諸儒所爭，四分幷減分兩家爾。曆象之要，可以晷景測之；今驗其分至薄蝕，則四分疏而減分密。疏者則稱政令有寬猛，運行致盈縮，非算之失也；密者則云日月有遲速，以術求之，預知其度，無災祥也。用疏則藏奸而不信，用密則任數而違經。且議官所知，不能精於訟者，以淺裁深，安有肯服？既非格令所司，幸勿當也。』舉曹貴賤，咸以為然。有一禮官，恥為此讓，苦欲留連，強加考核。機杼既薄，無以測量，還復采訪訟人，窺望長短，朝夕聚議，寒暑煩勞，背春涉冬，竟無予奪，怨誚滋生，赧然而退，終為內史所迫：此好名之辱也。      

——《顏氏家訓  省事第十二》 

驟眼看來，只是勸子弟別多事，不要固執原則而得罪人的老生常談而已；就算在在連鎖書店的「成功學」書架上讀到，也不會覺得違和。

然而，這場曆法爭論所折射出的，卻是漢朝以降儒者常有的想法：天人感應。天象異常，則是上天對世事的回應，或是對未來事的預警（「政令有寬猛，運行致盈縮」），而不是曆法有偏差。因此，明明推算出更準確的曆法，有人指責這是「任數而違經」。我說，以今天的觀點看，這大概就是迂腐吧。

朋友卻認為支持較疏的四分曆一派相當前衛：他們深信自然無法、也不應該被準確控制，不如保留漢代以來的傳承。況且容讓天象偶爾異常，換來皇權有所警惕，官員可以借機進諫，也有其價值。

不過，由魏晉至南北朝，四分曆還是逐漸被代替。越是近代，曆法越精，史書中便似乎越少皇帝因為因為天象異常而下罪己詔的記載。

臉書連結

上屋搬下屋

臨近搬家，近來都在收拾屋中物。

往往看見一件衣服，就想起上次看見已是三四年前整理雜物的時候了。那時還以為可能會再穿，還是暫時留着。再看一眼，算了，還是放進樂施會的收集箱吧。

有時看見一本書，會想到某年想過把它捐出去，但又以為還會再讀。結果嘛，在書架上一擱就是三四年。又不是什麼絕版珍藏，還是拿到樓下英國心臟基金會的二手書店吧。

如是者十幾天下來，二手慈善店也走了幾趟。

早知如此，之前就應該把它們捐出去，免得佔用地方之餘，人家也可能賣得一個較好的價錢。

但也許只能如此。日子是一天天過的，身外物也是一點點捨棄的。

====

臉書連結